انا بخاف من الكوميتمنت

في الاول عشان الناس اللي مش عارفه يعني ايه كوميتمنت او commitment هو الارتباط او الالتزام تجاه حاجة معينة ومش شرط يكون بالمنظور الضيق اللي كلنا بنتكلم فيه انه يبقى في التزام تجاه شخص لا هو ممكن يكون خوفك من استمرارك مثلا في شغلك كتير مع صحابك كتير او حتى خوفك من استمرارك انك تزور نفس الاماكن كل مره

المهم ان انا هتكلم من وجهة نظري عن خوف الارتباط من المنظور الضيق وهو خوف الارتباط وتكوين علاقة عاطفيه بينك وبين شخص تاني

عادة بيكون الخوف ده له اسباب زي ان مثلا الشخص مر بعلاقة قبل كده عقدته او انه خايف يلاقي حاجة في الطرف اللي هيرتبط بيه تضايقه فيمر بعلاقة فاشله تاني واسباب كتير تانيه

ومش معنى خوفك من الكومتمنت انك كائن متبلد المشاعر مبتحسش ومبتحبش لا عادي ممكن تكون بتحب وخايف ترتبط بيه عشان ايا كان سببك للخوف من الارتباط

  

يعني مثلا في الاغنية دي بتاعة جدل هو بيتكلم في الاغنية عنهم لما اتقابلوا وبدأوا يهتموا ببعض وفي الاخر بيقولها انا مكنتش عارف اني هحبك انا بخاف من الكومتمنت ده مثال يعني بس على ان ممكن حد يحب حد وهو بيخاف من الارتباط

من ضمن اسبابي الشخصية لخوفي من الارتباط الواحد بيقعد فترة كبيره بيدرس دماغ الناس اللي قدامه عشان يعرف هما دول اللي هيعرف يتعامل معاهم ولا لا بس فلنفرض اننا لقينا الشخص الكامل الخارق اللي مفهوش غلطة من وجهة نظرنا وعشنا مع بعض حياة سعيده لمدة 10 سنين مثلا وفجأه حد فينا اتغير عشان احنا بني ادمين وعقائدنا ومبادئنا مش ثابته ومع الوقت ممكن تتغير وبقينا الاشخاص اللي مكناش عايزينهم وبقى الشخص اللي قدامنا مش هو ده اللي احنا عايزينه ساعتها هنعمل ايه؟

فهل الوقت اللي انا اخدته كله قبل ما ارتبط وانا خايفه من الارتباط مكنش له لازمه بقى لان الشخص ده او انا معرضين نتغير في اي وقت وكان المفروض اخد الريسك من الاول ولا دي حاجة تخليني اخاف اكتر من الارتباط ان انا حتى لو لقيت الشخص اللي انا عيزاه وظنيت ان دي النهاية السعيدة ممكن كل شئ يتغير ومعرفش ساعتها اخد القرار هل اؤمن بالتغير ده ولا هكفر بيه

الفكره في ان السبب ده لو بصيت له من منظور يخليك متبقاش خايف ولو بصيت له بمنظور تاني يرعبك اكتر 

نفس الكلام لو مريت بتجربه سيئه مخوفاك انت مش عارف ايه اللي هيحصل فخايف يتكرر تاني طب لو بصينا لها من انه انا مش عارف ايه اللي هيحصل فممكن تكون حاجة كويسه الفكرة في انت بتشوف الموضوع ازاي 

فتقريبا الحل في الخوف احنا عارفينه بس دوافعنا للخوف اكبر من اننا نصدق المنظور التاني للاسباب!