مفتشين السوشال ميديا!! من التفتيش لخليهم يتسلوا
انا افتكر قبل الثورة ب 4 سنين مثلا كان لسه بداية انتشار الفيسبوك في مصر
واللي فكراه برضه ان محدش كان بيعرف يستخدمه لا صغيرين ولا كبار لدرجة ان عمرو اديب كان بيعمل فقرة كده في القاهره اليوم بيجيب واحد بيعلم الناس ازاي يعملوا اكونت وازاي نواكب العصر ونبقى شعب مودرن ومع العولمة وكده
بعد الثورة الفيسبوك انتشر بطريقة غريبة لانه هو بقى الكائن الغريب اللي كان سبب في ان واحد زي مبارك ده يتشال او ده اللي كانوا وكنا فاكرينه😭
فالناس دخلت على السوشال ميديا دخول جاهل لسه بيجرب
لحد ما تقريبا دلوقتي مافيش حد مش عارف ازاي بيستخدم الفيسبوك وبيعمل ايه
الفكرة من اي موقع "تواصل اجتماعي" اننا نتواصل او اننا نعرف اخبار بعض اني اكتب اللي في دماغي اللي عاوز يشتكي يشتكي اللي عايز يشجع فريق كره يشجعه اللي عايز يبقى عميق يبقى وهكذا
ودور الشخص المتفرج او اللي هيتفاعل مع حاجة زي كده انه "يتفاعل" مع الكلام ده يكتب تعليق يتجاهل يتقبل مروره العطر
الفكرة اللي انا بكتب عنها اصلا وعامله المقدمة الكبيرة العظيمة دي هى "مفتشين السوشال ميديا" او مباحث البوستات
هو شخص زيي كده دلوقتي او زي اي حد قرر انه يلاقي الناس ماشيه في حاجة جديدة معينة فيبدأ يعلق عليها ويدي تعليقات من نوعية (مش كفاية يا جماعة بوستات عن كذا- او ايه يا جماعه هو كله بقى بيعمل كذا- او الخ ) وحاجات كتير كده
هو طبيعي ان اي انسان ممكن يشوف تصرف معين يضايقه او حاجة يحب يكتب عنها بس النوعية دي من الناس بيبقى قاعدين بالمرصاد شبه المفتشين فعلا يعني بحس لسان حالهم "لم علينا عبيدك يارب بقالنا يجيي كام ساعة معلقناش على حد ولا حبينا نكسر الترند" ده بيكون احساسي لما بشوف النوعية دي من الناس والناس دي بتوصل لدرجات من المبالغه فانهم بقوا بيكرهوا العالم او ليه يارب مخلقتناش في حته تانيه (في ناس تانيه في الحته التانيه بيعملوا حاجات تانيه على فكرة) او يبدأ عشان هو يلفت الانتباه يهزر او يتريأ او يقلل من الناس الخ برضه
وانا عذراهم وعذراني برضه لاني بكلامي ده بقوم بدورهم لمده 10 دقايق الانسان طبيعته بيحب يكون مافيش حد زيه فده بينعكس على افعاله بيحب دايما يكون هو الصح دايما
طبعا درجة حب التفرد بتختلف من انسان لانسان وخلوني احكم على الناس دي انهم بيحبوا يبرزوا نفسهم او بيكونوا attention seeker من الجانب ده
انا بكتب الكلام ده وانا عارفه ان زي ما من حق الناس اللي هما بيتريقوا عليهم او شغالين مفتشين عليهم وبينتقدوهم طول الوقت هما كمان من حقهم النقد
بس ياريت يا جماعة كلنا نفكر ونفتكر .. ان احنا اصلا معيوبين يعني وبنقعد نكتب في حاجات على السوشال ميديا تعر ... وان كل واحد من حقه يعمل اللي هو عايزه ويكتب اللي هو عايزه وان في غيرنا بيستنكروا كتباتنا وهكذا .. وقبل ما تعلق على الناس واحداثها في استخدام السوشال ميديا افتكر انك محدث انت كمان عشان مش عارف تحترم حقوق غيرك!
ونصيحة من اختكوا الصغيره بلاش انفعال في بوستات تافهه عشان الزبحة ماشيه في البلد اليومين دول
وياريت ناخد بنصيحة اب المصريين "حسني مبارك" لما قال :"خليهم يتسلوا"
Comments
Post a Comment