Personal Spaceاللامؤخذه ال

 Personal Space فمن اهم الحاجات اللي كنا بنتكلم عنها ال  communication skills كنا واحنا بندرس اخدنا كورس 

 خلونا نتكلم عنها شوية

أولا المفروض في المنطقة المحيطة بيك بيكون حواليك زي دايره وهميه نص قطرها هو طول دراعك 

وكل ما بتقرب من الناس اكتر مع طبعا وضع الاعتبار لمكانه الشخص بالنسبة كل ما المساحة دي بتقل

بس طبعا زي ما كلنا عارفين ان واحنا راكبين الميكروباص (المشروع) انت مش من حقك يبقى ليك Personal Space ولا اي نيله اصلا يعني ممكن الحاجة اللي جنبك تبدأ تجس نبضك الاول وتشوف هى لو واخده نص كرسيك انت هتعترض ولا لا .. معترضتش يبقى تريح عليك بدراعها على دراعك .. راكب اتوبيس وربنا كرمك ولقيت مكان فاضي خدي شيلي الكيسة دي .. أنتي مين يا ولية انتي اساسا؟ .. الدنيا اتزحمت ممكن تقعد على رجلي بدون اي سابق انذار او مبررات .. اخرهم النهاردة ست مربعه ومريحة كأني بنت خالتها

بس طبعا احنا شعب (عشري) وابن بلد وجدع فبيعتبرونا قرايبهم المقربين جدا جدا جدا!

ثانيا ال Personal Space من الامور الشخصية بغض النظر اني ساعات بتخطى الموضوع ده بمراحل مع الناس القريبة مني او اللي انا بحبها وبتدخل يمكن من وجهة نظري للاطمئنان فلو افترضنا برضه الدايره الوهميه اللي حوالينا دي لسه موجوده بس المره دي مش مساحة لا ! براها الجانب اللي انت حابب تظهره للناس او تشارك الناس بيه وجواها الجزء المحتفظ بيه لنفسك او بتسمح بجزء منه للناس القريبة جدا

برضه ناس كتير جدا بتقتحم المنطقه دي بحجة انهم بيطمنوا مش قد ما هو فضول او تطفل وممكن توصل لمرحلة الاحراج او انك بتجرح الناس عشان ترضي فضولك

الملخص احنا مش مجبرين نستحمل الناس عشان مكسوفين كل واحد له حق في انه ياخد ال Personal Space بتاعته واعتقد المره الجايه لما اللي قاعده جنبي تريح بكتفها او تربع هزعق فيها بشدة وبحزم واقولها ما تنزاحي يا ولية بقى 😀