ما هو التدين؟
احنا دايما بيبقى من وجهة نظرنا المتدين هو الشخص اللي بيصلي ويصوم كتير ولو راجل مربي دقنه ولو ست بتبقى لابسه عبايه او حتى احيانا بناخد بالمظهر الخارجي يعني انه عشان واحد مربي دقنه وماسك سبحة يبقى شيخ وممكن الشيخ الوحيد اللي يكونه هو (شيخ منصر) وان ست لابسه عبايه ممكن تكون ما تكون يعني!
مع ان الدين مش محصور في صلاة وصيام
جدودنا دايما بيقولوا الدين معاملة واحنا كنا بناخدها كلمة طيبة بتكرر او بتكبس بيها واحد من المتشددين لما يكون فظ معاك فتقوله " ايه يا عم ده الدين معاملة"
فبنقع دايما تحت فكرة ان لو حد بيصلي كتير او عليه اي مظهر من المظاهر الدينيه اللي احنا حددناها انه لازم يبقى شخص مثالي وهو غالبا الشخص ذاته ساعات بيصاب بجنون العظمة انه عشان بيعمل (فروض) في دينه فهو كده اعظم من الناس وبيبدأ يتعامل معاهم على الاساس ده
ممكن تكون شخصيه لابسه عبايه وبتحفظ قران وبتجيب في سيرة البنات وبترمي المحصنات اللي هى من الكبائر وشخصيه تانيه لبسها عادي ومبتعملش ده ... انا مش ربنا عشان اقول مين الاحسن ولا احنا
او شخص بدقن بس ممكن يكون بيتحرش لفظيا بالبنات تحت مسمي الدين الموهوم انه كده مثلا بينصحهم اللي هو بيبقى نصيحة دينيه مختلطة بتحرش لفظي مثال "انتي جسدك فتنه لازم تستريها وربنا رزقك بوجه جميل لازم تغطيه" انت فين من غض البصر في اللي بتقوله في حين ان ممكن حد ينصح بطريقة احسن من كده من غير ما يحرج البنت
الفكرة في الفكرة وطريقة التفكير الخاطئة
وفي كذا طريقة
- ان انا افكر ان الشخص "المتدين" شكلا ده ملاك وابدأ اصدق على كل كلامه من غير تفكير عشان هو بس بيعمل حاجات عادية جدا ممكن اي واحد غيره يكون بيعملها ومش بيتظاهر بيها ولو كان الشخص ده اتكلم نفس كلام اللي ظاهريا باين لك انه متدين مكنتش صدقت كلامه ولا اقتنعت به
- متحكمش على "المتدين" عشان هو غلط فيبقى منافق هو بيعمل جانب صح ومقصر في جانب وهو غلطان فيها زي ما انت مقصر في جانب هو صح فيه وانت بتعمل حاجة صح هو غلطان فيها
الموضوع كله لو بصينا لبعض على اننا بني ادمين انا بغلط فغيري بيغلط فكلنا بنغلط لاننا بشر وكلنا في الحقيقة متدينين لاننا كلنا بنحمل دين معين متبعينه منا بينفذ جزء وجزء لا ... في بينفذ جزء ظاهر فبعض الناس قربوا يتخذوهم كألهه وفاقدين جزء مهم متستر بس هو جزء مهم في الدين هيتحاسبوا عليه زي ما غيرهم اللي فاقدين الجزء الظاهر ده هيتحاسبوا عليه وهيجازيهم ربنا بالجزء المتخفي اللي الناس مش شيفاه الجزء الكويس اللي بيعملوه 😃 وعشان هو مختفي فالناس مفكرينهم مافيش منهم فايدة مع انهم عندهم حاجات كتير كويسه مش عند متدين ظاهريا
متحكمش على الملتزم انه ملاك ولا انه منافق ولا انت تفتكر نفسك عشان التزمت شوية يبقى معصوم من الغلط
Comments
Post a Comment