لو كانوا سألونا قبل ما يولدونا عارفين كنا نقول ايه!
ثلاثي اضواء المسرح لما غنوا الاغنية دي كانت اظن ومش معلومة اكيده من فوق ال 60 سنة بس كانوا بيسخطوا يعني على حال الناس وكده
أنا قصدي من العنوان ده لو فعلا كنا اتسألنا وشوفنا هنتربى ازاي .. وازاي ممكن اهلنا ميكونوش فاهمينا وكمية الضغط النفسي والتشوهات والامراض النفسية اللي ممكن تحصل بسبب غلطة منهم
اللي خلاني من امبارح عاوزة اكتب حاجة عن الموضوع ده ومش عارفه ابدأ ازاي كنت في تجمع نسائي فابتدت واحده تحكي عن ابنها اللي هو تقريبا في (رابعه ابتدائي) انه بيضرب اخته الصغيره وبيضربها وشبهته بانه عنده انهيار عصبي مش طفل مثلا عدواني ويبقى تحلل ده سببه ايه اللي هو غالبا بسببها او بسبب ابوه عشان ده لسه (عيل)!
فمن خلال الكلام بعدها فهمت انها منفصلة عن جوزها وانها سايبه ابنها يبات عند عمته عشان مش مستحملاه يعني وكانت عاوزة توديه يعيش مع باباه
معرفش هو انا دماغي ك ساندي قفزت لاستنتاج ان الولد ده ممكن يكون عصبي كده من ظروف الانفصال وكنت خلاص هقولها يعني ممكن تشوفي المشكلة فين وتحاولي تحليها مش ترميه كده يعني!
والله يا جماعة انا قولت الكلام ده قبل كده الصفات الجينية دي صفات موروثه اشطة ملناش يد فيها انما الصفات المكتسبه دي "مكتسبه" من البيئه المحيطة بيه واظن طفل في 4 ابتدائي مش خطر على البشرية وميعرفش ناس غير اهله وصحابه الاطفال اللي زيه
فبدل يا جماعة ما تفضحوا ولادكوا واسرار بيتكوا بره والله كنتوا قبل ما تتنيلوا تجوزوا وتخلفوا فكروا يعني
انا عندي سبب رئيسي اني بخاف اتعامل مع اطفال او خوفي من الجواز هو خوفي من اني اكون سبب في اذية اي طفل باي شكل من الاشكال يعني لو هتجوز وابقى مش عارفه اربي ولادي يبقى بلاها الخلفه يعني
فاحنا كبني ادم بنيجي نستغرب لما تلاقي واحد قرفان من حياته ولا معندوش ارتباط باهله واننا كل مدى ما بيبقى في كره ومشاكل ودايما كل واحد شايف نفسه المظلوم فهو لو كان مثلا بيصرف عليهم فهو شايف انه كده قام بواجبه ومقصرش وهو مقصر بجانب كبير جانب التربية والحب اللي المفروض يوصله لولاده وفي ناس ابجح اللي بيبقى شايف ان انا ابوك او امك فانت واجب عليك تاكل زفت وانت ساكت
ونرجع نستغرب ليه في ناس بترفع قواضي على اهلها وتوديهم دار مسنين اللي انت بتزرعه انهاردة هتحصده بكره
المخلص يا جماعة ربنا هيحاسبكوا والله على العيال دي ومترجعوش تشتكوا وابقوا افتكروا انتوا ربيتوهم ازاي وشوفوا فعلا هل لو بعد ما جبتوهم وربتوهم لو سألتوهم هما راضيين هتبقى اجابتهم ايه !
Comments
Post a Comment