اصحاب ولا بيزنيس 😀

في الفيلم بتاع اصحاب و بيزنيس كنا شايفين 2 صحاب بيضربوا في بعض (مجازيا) عشان خاطر كل واحد ياخد مكان التاني ويبقى اشهر من التاني وفجأة لما خسروا كل حاجة هما الاتنين اكتشفوا ان هما فعلا صحاب 

مؤخرا بقى عندي ظاهره غريبة وهى اني ببص على صحابي من بعيد كده - انا عارفه اني مش صديقة مثاليه وعارفه اني فيا عيوب كتير وان ناس كتير مستحملاني- بدون دخول في تفاصيل اوفر او جو بوستات صفحة احتواء وكده بس فعلا الناس بقت بتتساقط يعني

اكتشفت ان ليا صحاب مثلا بقالي 9 او 10 سنين اعرفهم وانا معرفهمش كل اللي اعرفه عنهم مشاكلهم وكنا دايما بنتصور ونكتب عشرة العمر على اساس ان احنا مثلا داخلين مسابقة بنعد فيها عدد السنين اللي بنعرف بيها بعض مش كام مره كانوا جنبي في مشكلة يعرفوا ايه عن حياتي اتعاملوا معايا ازاي هل عندهم انتظار المقابل ولا بيعاملوك لله ف لله وعشان ده اللي المفروض يتعمل او ده دوره كصديق فالدايره عماله بتصغر 

كان حصل قبل كده مشكلة ليا فاني كان ليا صاحبة عزيزة جدا عليا وبعدنا عن بعض فقدرت اتكلم مع دكتور تنمية بشرية ولما لقاني متأثره ومش عارفه اتخطى الموضوع ده قالي اعتبري الناس 3 دواير .. دايرة فيها الناس المقربين منك جدا ودايره فيها الناس متوسطة ودايره فيها ناس مش فارقه معاكي او اعدائك مثلا اللي كان في اول دايره وهو ميستحقش يكون فيها ممكن ترجعيه اخر دايره او تاني دايره وممكن تلاقي ناس انتي حطاهم في اخر دايره وهما يستحقوا يكونوا في اول دايره الموضوع ده علمني حاجة اني اتوقع اي حاجة من اي حد يعني اللي انا حسباه انهاردة وحش ممكن اصلا هو الحلو والعكس اللي انا حسباه حلو ممكن يبقى وحش

هو اه بيبقى موضوع مؤلم لما انت بتبقى حاطط ناس في اول دايره وانت بتبقى عندهم اصلا في تاني دايره بس عادي انت مش بتحدد مين لو الموضوع انت مش عارف تتقبله او تتعامل معاه ممكن تنزل الشخص ده درجة ويكون في تاني دايره او التالته او بره دوايرك اصلا 

اللي خلاني اكتب الكلام ده طب والناس اللي في اول دايره ومفهمينك انك في اول دايره وانت بالنسبة لهم درجة تانيه 😂 بتبان من تصرفات وافعال واختلاف كل شخص في افعاله وطريقة تعبيره شئ وارد جدا بس لو قارنا باقي تعامله مع الناس فالعقل بيقول انك درجة تانيه فعلا 

فهنا انا ببقى واقعه في حيرة انا مش عارفه احطكوا فين 

 

واحيانا تانيه بيبقى في ما يسمى بمرحلة ال Denial اللى هى كل حياتي تقريبا 

ودي بتبقى متلخصة في ان الشخص بيبينلك انك شخص عادي وانت بتكذب نفسك وبتقول يمكن لا

كان في شخص قالي قبل كده انا عمري ما هحارب عشان افضل صاحب حد وارتبط بحد او بلا بلا بلا وان العلاقات تكون مريحة ومفهاش مشاكل وفيها تفاهم وانا كان رأيي لا ان لازم وازاي وعيب وميصحش واحنا لازم نبني امجادنا بسواعدنا وجو كتاب القراءة  ده فمؤخرا بدأت افكر انه ليه لا ؟

ليه لو حد اعرفه مسبب لي اذى نفسي منسحبش ليه بدي فرص كتير من الاول؟ 

الحياة اقصر من ذلك 😀 وانا ضربت الودع ملقتش صاحب جدع 😂!