من اللي خدته القرعة حتى اللي باعنا خسر دلعنا

بغض النظر عن العنوان الركيك اللي مكتوب والمثل الشعبي المعروف "اللي خدته القرعة تاخده ام الشعور" والجزء التاني عن ردح السوشال ميديا

أنا بكتب المقال او البوست ده او ايا كان مسماه عشان حاجة بتنغص عليا حياتي وان كان كل واحد حر بس موضوع الحسد اعتقد انا كنت اتكلمت في الموضوع ده قبل كده باسلوب مش سخيف اوي او مش نقد لاذع اوي كان من ده على ده بس انا النهاردة ناويه انقد نقد لاذع 😂 وردح الاونلاين واللي اعتقد متكلمتش فيه قبل كده

في يوليو 2012 اتخطبت وبما انها كانت غلطة عمري ودرس عمري في نفس الوقت فانا مش هكذب عليكوا يا جماعة انا كنت من الناس اللي بتقعد تكتب يا ناس يا شر كفاية قر والعين عليها حارس ويارب تكون ذاكرتي خيناني وان يكون ده مش حقيقي انا تقريبا كنت حاطة cover على الفيسبوك خمسه وخميسه وكده

فبما ان بعد كل صدمة في حياتك انت بتنضج بدري شوية وكده فلما دلوقتي بدخل اشوف اني كنت بكتب كده بستتفه نفسي اني كنت مخطوبة اه بس معملتش انجاز احسد عليه طبعا هتيجي واحده من المتدينين موت وكده وتقولي ما الحسد مذكور في القران 

الحسد لما ذكر في سورة الفلق كان فيه استعاذه يعني مش لوم للناس الحساد الوحشين اللي انت مركز الكون وهما هيحسدوك عشان فوزتي بالجائزة الكبري واتخطبتي وانتي محدش يعرفك اصلا ولا مهتم يعرف اخبارك فحتى وان حصل وحد قاصدك وانت محور حياته وبيغير منك فالمفروض تبقى استعاذه مش نوعية البوستات التافهه بتاعة ابعدوا عينكوا عن حياتنا ولما اتسأل شيوخ كتير في الموضوع ده قالوا ماشي الناس دي مضيقاكوا بس الحسد تقصير منكوا وبعد عن ربنا يعني الاذكار تحصين وهكذا ولا بتأمنوا ببعض الكتاب وتكفرون ببعض؟! 

الغريبة ان من اول ما بينزلوا صورة البوكس ابو دبل اللي في وش الكاميرا وانا ببقى مستنيه بوست الحسد بعديه والموضوع بيتطور للعيال بعد كده وبيحطوا صورة دباديب على وشوش عيالهم وكده مع ان والله يا جماعة في صفحات اجنبيه فيها عيال انضف من عيالكوا بخشروميت مره وامهاتهم بتنزل صورهم والعيال كويسين وزي الفل صفحات بتبقى معدية المليون لايك ومحدش من المليون حسدهم انما انتي يا ام 1000 فريند ده لو انتي انفلونسر يعني اللي عيالك المقشفين هما اللي هيتحسدوا او برضه اللي بتتصور هى بس من غير خطيبها او جوزها على اساس انها متجوزة اشتون كوتشر برضه في بره قطع نضيفه كتير انضف مننا كلنا يعني مني ومن اللي هتجوزه ومنك ومن اللي متجوزاه ومش بتتحسد ولا حاجة مع انهم كفار برضه سبحان الله

غالبا فقرة الحسد دي بتبقى ترافق الفتره بتاعة ضحك ولعب وجد وحب وكده اللي هى بتبقى في اول الخطوبة بعدها بتبدأ تحصل مشاكل فبنبدأ نلاقي حسبي الله ونعم الوكيل مغرقة ال home page بتاعة الفيسبوك او الرجوله ادب مش هز كتاف تلقيحا على النطع اللي المفروض انها هتتجوزه ليه عشان مثلا نسى يكلمها بليل اما هو مش راجل هتتجوزيه ليه؟! او البوم الاستاذه اصاله الجديد واغنية كان طيب كان حنين اتاريه كداب كبير للهضبة

انا كل اللي بتصوره ان احنا كبنات مسحوبين من لساننا وبنرجع مشاعرنا في كل حته لو كان اللي انتي مهزقاه معاكي ده عمل ربع اللي انتي بتعمليه كانت ابسط كلمة هتتقال انه مش راجل عشان بيخرج اسراركوا بره ومخلي حياتكوا مشاع .. طب انتي ك ست يتقال عليكي ايه؟ 

هو لو بيستحمل الهطل اللي انتي بتلقحي بيه عليه ده فهو يا اما راجل محترم وماشي باننا ناقصات عقل ودين فخليهم يتسلوا يعني وهيطلعوا عليكي باشكال اخرى يا اما معندهوش دم واتمنى لكوا يا جماعه انه يكون من النوع الاول افضل بكتير من النوع التاني

المشكلة ان ده هيرجعنا للنقطة الاولى تاني لو حد كان سألك انتي كاتبه كده ليه كنتي هتقولي وانتوا مالكوا بحياتي وتشوفوا اللي انا شيفاه يارب وكده مع انك اصلا اللي مهزأه نفسك قدام الناس وناشره تفاصيل حياتك وانتي اللي اتديتي الحق للناس انها تشاركك فيها 

انا عن نفسي لما بشوف واحده بتخرج اسرار ما بينها وبين شخص تاني كده بتنقص من نظري حتى لو كانت هى في مكانه كبيره عندي ومقربة مني

انا للاسف عارفه ان غالبا اللي بيعملوا كده مش هيقروا المقال ده لانهم مشغولين في شرطة ال anti حسد او بيدوروا على حد يهينوا كرامته على الفيسبوك فكأني بأدن في مالطا

على العموم المقال ده مالوش اي هدف غير اني اطلع شحنة غيظ من النوعيات دي من الناس اللي كنت انا في يوم من الايام شبهم جزئيا وكملوا يا جماعة حياتكم بانشغالكم باللي باعكم وخسر دلعكوا او يا حاسدين الناس مالكم ومال الناس