لماذا نحن ناصحين (الهبد في فتاوي ستات الجامع)

أنا مش بدعي المثالية ولأني عارفة قد ايه انا بعصى ربنا في الخفاء وربنا بيجملني قدام ناس كتير دايما بلتمس العذر لأي شخص مبيعملش طاعة انا بعملها ودايما بقول الله اعلم من عند الله اقرب لأن انا عارفة كويس ذنوبي وعارفة انا قد ايه بعصى ربنا ولكني بحاول

ولأني بحاول عمري ما قللت من محاولات غيري وما افتكرش اني مثلا نصحت حد في الدين بطريقة تنفره او تضايقه 

من 5 سنين تقريبا بدأت اصلي التراويح في المسجد كلها من اول رمضان لأخره 

بعد ما كنت بروح في سنين كتير ومبكملش لأسباب عديدة من ضمنها اني عشان صغيرة ف اتزنق في الصفوف عادي او اتحرك للست الكبيرة اللي داخلة في نص الصلاة عشان تقعد وانا اترمي في اي حته او اترحم من اني لابسة بنطلون وصلاتي مش مقبولة 

فأنا يمكن بكتب المقال ده عشان اقول الانتقادات اللي الستات انتقدوهالي والكلام ده غلط وهم افتوا بدون علم او حق للفتوى وبعد ما هسترسل في الهبد او فتاويهم الغلط هقول من وجهة نظري ليه بيعملوا كده ودي حاجة انا أتكلمت عنها في مقال قبل كده

1- *بحط المصحف على الارض*

*اللي جنبي بتسيب الصلاة وتقوم تحط المصحف فوق راسها*

*بتبصلي باشمئزاز كأني من المجوس بعبد البقر وتقولي انتي ازاي تعملي كده هتتسخطي قردة وانتي واقفه*

فتوة بجواز وضع المصحف على الارض من ابن الباز 

اهو في اللينك اعلاه بيوضح ان المصحف ممكن احطه على الارض عادي ما دام لم يقصد به اهانة وبالذات اني داخله في الصلاة وحطاه قدامي على مصلية مش مثلا حطاه على الجزامة في الجامع الغريب ان الستات في الجامع وقد تكون نفس الست اللي زعقت لي وفتت هذه الفتوة العظيمة بيحطوا جزمهم فوق مكتبة المصاحف 

because fuck logic

احنا نحط جزمنا فوق مكتبة المصاحف انما نحط المصحف على الارض ليه احنا هنكفر ولا ايه

2- *بقرا في الصلاة مع الشيخ من الموبايل*

*بنسلم*

*واحدة جنبي: انتي عارفه ان مينفعش تمسكي الموبايل في الصلاة*

*منا بقرا قران*

*لا اقري من المصحف انتي مش بتاخدي ثواب على القراءة من الموبايل*

الجدير بالذكر ان المصحف بقى مصحف بعد ما الرسول صلى الله عليه وسلم مات يعني الرسول نفسه مكنش بياخد ثواب بقى من قراءة القران عشان مكنش بيقراه من المصحف بتاع حضرتك؟

طب والناس اللي حافظة القران هياخدوا ثواب ولا لازم يمسكوا المصحف؟

3- *بكمل بعد ما الامام يسلم صلاة فائتة*

*بسلم واقعد*

*واحدة بتخبط على ضهري "السلام عليكم هو انتي بتصلي ايه"*

*صلاة فائتة*

*بس انتي لازم تتبعي الامام*

*ازاي مش ساعات لو دخلنا في نص التراويح ممكن نكمل العشاء اللي فاتنا ونكمل معاكوا التراويح*

*بس انتي كده بتشتتي الناس*

ده رأي شيخ في اللي انا بعمله بالظبط صح 

رأي دكتور حاكم المطيري

رأي الشيخ عمرو شاهين

رأي الشيخ احمد عبدالسلام 

رأي الشيخ أحمد سالم

ولولا اني مش عاوزة اطول في النقطة دي لكنت جبت كل اراء الشيوخ في النقطة دي اللي تقريبا مافيش واحد اختلف ان ده يجوز بل الاحسن اننا نعوض اللي فايتنا من الصلوات وثوابه اكبر واعظم

4-*انتي مش لابسه شراب ليه كده صلاتك لا تجوز*

*الحنفية بيقولوا جواز ظهور وجه المرأة وكفها وقدمها*

*بس البسي شراب احسن*

طب يعني يا ستي الامام ابو حنيفة قال انه يجوز وانه ام شراب مش احسن من الحافية في حاجة انتي عشان سمعتي كلمة من غير ما تدوري وتبحثي اقريتي خلاص انه الشراب احسن

5-*روحي البسي جيبة صلاتك باطلة بالبنطلون*

الحقيقة ان الموضوع ده كان بيحصل زمان لأني حاليا مش بلبس بنطلونات على حاجات قصيرة بس حتى لو.. معظم الناس اللي بتصلي في رمضان او بتقرب من ربنا بيبقى نفسها تكمل بتبقى دي خطوة عايزة تستمر عليها لبعد رمضان ليه ننفرهم من اللي بيعملوا بدون علم وازاي انتي تحرمي وتحللي من غير العلم الكافي اللي يديكي الحق في انك تقعدي تفتي 

حكم ابن الباز في الصلاة بالبنطلون ولو كان ضيقا!

دول تقريبا اكتر 5 حاجات بواجهم في الصلاة اللي المفروض اني اروح اصفي ذهني اتقرب لربنا مبقاش متضايقة ومتكدرة من اللي حواليا اللي هى كل كلامهم غلط في غلط

حكم الفتوى بدون علم

اهو ده اللي حرام مش كل اللي انتوا بتفتوه

أنا افتكر مرة وبدون فتوى ولا حاجة كنت بتكلم مع حد فاصريت على ان اللي انا بقوله صح وبعد سنين اكتشفت اني كنت بهبد اكبر هبدة ف الحياة

ولسه ضميري بيأنبي حتى يومنا هذا مع اننا كنا بنتعارك على اسم ماونتن ديو الصح ايه بالظبط

مش صحة صلاة انسان ولا هياخد اثم ولا لا وبعدين يا جماعة ما تركزوا في صلاتكم وتخليكوا في حالكوا 

انتي السنة اللي بتعمليها في قعدة التورك بتاعة التشهد واحنا بنصلي في الزحمة دي الرسول امر بتركها

النميمة اللي شغالة ما بين الصلوات ربنا قال ايحب احدكم ان يأكل لحم اخيه ميتا

في مرة اتكلمت عن اننا بنحب يبقى عندنا سلطة على اللي حوالينا سواء مثلا احنا اغنيا فبنتباهى بفلوسنا او احنا عندنا شوية علم فبنتريأ على الجهلا واحنا ك اسكندرانية عندنا بحر مكفرين باقي الشعب عليه

ففي ناس بتحس انها ليها مكانة بأنها بتنصح وبتفتي وبتزعق في نص الجامع مع ان المفروض صوت الست ميبقاش عالي في العموم والمفروض محدش يبقى صوته اصلا عالي في الجامع 

فهما في وجهة نظرهم تميزوا عن غيرهم في الدين 

انا مش بتهم الكل بانهم عندهم نقص بيكملوه بتدينهم المزعوم على رأي ابويا مرشوشين تدين .. انا كان في ناس من حلاوة اسلوبها في انها بتكلمني او بتنصحني بعمل اللي هما عايزينه حتى لو عارفه انهم محبكينها وانه مش لازم

المفروض بس مننا كلنا على قد عظمة اننا نفتي بدون علم نتحرى الدقة في الكلام ده الشيوخ بيقولوا بعد كلامهم الله اعلم انتوا جايبين الثقة دي منين

وده يمكن سبب من الاسباب ان ربنا قال ان صلاة المرأة احسن في بيتها وادينا اهو لما نزلنا الجوامع خربنها 

اعتقد اني هصلي بعد كده في بيتنا احسن لي واكرم لي بدل ما اخسر ثواب ما اعمله على من لا يستحق

وهنهي المقال بآية "أتأمرون الناس البر وتنسون أنفسكم" !